انگلش کرکٹ ٹیم نے دورہ پاکستان کی حامی بھر لی

انگلش کرکٹ ٹیم نے دورہ پاکستان کی حامی بھر لی

انگلش کرکٹ ٹیم نے دورہ پاکستان کی حامی بھر لی

انگلینڈ کی خواتین کی کرکٹ ٹیم پاکستان میں میچز کھیلنے کیلئے راضی ہوگئی

کراچی ( یکم فروری2019ء) انگلش کرکٹ ٹیم نے دورہ پاکستان کی حامی بھر لی، انگلینڈ کی خواتین کی کرکٹ ٹیم پاکستان میں میچز کھیلنے کیلئے راضی ہوگئی۔ تفصیلات کے مطابق ویسٹ انڈیز کی خواتین کرکٹ ٹیم کے کامیاب دورہ پاکستان کو دیکھتے ہوئے انگلینڈ کی خواتین کرکٹ ٹیم نے بھی پاکستان کا دورہ کرنے کی حامی بھر لی ہے۔ اس بات کی تصدیق پی سی بی حکام کی جانب سے کی گئی ہے۔

پی سی بی حکام نے بتایا ہے کہ ویسٹ انڈیز کے بعد انگلینڈ اور بنگلہ دیش کی خواتین کرکٹ ٹیمیں بھی پاکستان میں میچز کھیلنے کیلئے راضی ہوگئی ہیں۔ دوسری جانب آئی سی سی کے سکیورٹی کنسلٹنٹ ڈیوس سنیر نے پاکستان میں سکیورٹی انتظامات پر اطمینان ظاہر کرتے ہوئے کہا ہے کہ پی ایس ایل کیلئے سکیورٹی پلاننگ اطمینان بخش ہے۔

پاکستان کے تین روزہ دورے پر آئے ہوئے ڈیوس سنیر پی ایس ایل سے متعلق سکیورٹی صورتحال کا جائزہ لے رہے ہیں جن کا کہنا تھا کہ مذکورہ سکیورٹی پلاننگ کے ساتھ پی ایس ایل کا ایونٹ کامیاب رہے گا جس کی تفصیلی رپورٹ آئی سی سی کو دی جائے گی۔

یاد رہے کہ پاکستان کرکٹ بورڈ (پی سی بی) کے زیر اہتمام پاکستان سپر لیگ کا چوتھا ایڈیشن 14 فروری سے یو اے ای اور پاکستان میں شروع ہوگا، لیگ کا فائنل 17مارچ کو کراچی میں کھیلا جائیگا، لیگ میں 6 ٹیمیں ٹائٹل کے حصول کیلئے پنجہ آزمائی کرینگی، لیگ راﺅنڈ روبن فارمیٹ کے تحت کھیلی جائیگی۔ اب تک اسلام آباد یونائیٹڈ کی ٹیم دو دفعہ اور پشاور زلمی کی ٹیم ایک بار لیگ جیت چکی ہے۔

پاکستان سپر لیگ کا افتتاحی میچ 14فروری کو دفاعی چمپئن اسلام آباد یونائیٹڈ اور لاہور قلندرز ٹیموں کے درمیان دبئی میں کھیلا جائیگا۔ پی ایس ایل کے چوتھے ایڈیشن میں فائنل سمیت کل 34 میچز کھیلے جائیں گے جس میں سے آخری 8 میچز پاکستان کے شہروں لاہور اور کراچی میں کھیلے جائینگے۔ لاہور میں 3 میچز جبکہ فائنل سمیت پانچ میچز کراچی میں کھیلے جائینگے۔

نیشنل سٹیڈیم کراچی میں پہلا میچ 7 مارچ کو کراچی کنگز اور پشاور زلمی کے مابین فلڈ لائٹس میں ہوگا جبکہ لاہور میں پہلامیچ 9 مارچ کو لاہور قلندر اور اسلام آباد یونائیٹڈ کے مابین کھیلا جائیگا۔ پاکستان میں کھیلے جانے والے 8 میچز کے علاوہ دبئی انٹرنیشنل سٹیڈیم میں 14میچز اور چار میچز شیخ زید سٹیڈیم ابوظہبی میں کھیلے جائینگے۔ شیدول کے مطابق پی ایس ایل میں شرکت کرنے والی تمام ٹیمیں ہر ٹیم کےساتھ دو دو میچز کھیلیں گی۔ جنوبی افریقہ کے اے بی ڈی ویلیئرز، زمبابوے کے برینڈن ٹیلرسمیت 19کھلاڑی پہلی بار پی ایس ایل میں ایکشن میں نظر آئینگے۔ پاکستان سپر لیگ کے چوتھے ایڈیشن کا فائنل میچ 17 مارچ کو کھیلا جائیگا جو نیشنل کرکٹ سٹیڈیم کراچی میں کھیلا جائیگا