سینے پر جعلی بم باندھے اداکار نے 'اللہُ اکبر' کا نعرہ لگایا تو کیا ہوا؟ یہاں جانئے

سینے پر جعلی بم باندھے اداکار نے 'اللہُ اکبر' کا نعرہ لگایا تو کیا ہوا؟ یہاں جانئے

تہران: ایران کے ایک مصروف شاپنگ مال میں فنکاروں کو فنکاری مہنگی پڑ گئی۔  داعش کے لباس میں موجود فنکار اپنی فلم کی تشہیر کررہے تھے کہ لوگ سہم گئے اور مال میں بھگڈر مچ گئی۔

تفصیلات کے مطابق ایرانی فنکار شام کے موضوع پر بننے والی ایک فلم کی تشہیر کررہے تھے، جس میں باپ اور بیٹا انسانی مدد کے لیے شام جاتے ہیں لیکن داعش کے دہشت گرد انہیں اغوا کرلیتے ہیں۔ اس فلم کا موضوع بہت اچھا تھا لیکن اس کی تشہیر کا اثر منفی ہوا ہے۔

دمشق ٹائمز نامی اس فلم کی ہدایات ابراہیم حتمیکیا نے دی ہیں۔ فلم میں شامل فنکار تہران میں واقع کوروش نامی سنیما اور شاپنگ مال میں خاموشی سے داخل ہوئے، لیکن انہوں نے تصاویر بنوانے کے بعد اپنی اداکاری کے جوہر بھی دکھانا شروع کردیے۔

داعش کے جنگجو کے میک اپ میں موجود ایک فنکار نے جب شاپنگ مال میں اپنا گھوڑا دوڑایا اور اللہ اکبر کا نعرہ لگایا تو دکان دار اپنی دکانیں خالی چھوڑ کر سرپٹ بھاگے۔ اداکار نے سینے پر جعلی بم بھی باندھا ہوا تھا۔ دوسری جانب ایرانی فلم سازوں نے اسے ایک غلطی اور مضحکہ خیز عمل قراردیا ہے۔

ان تمام فنکاروں سے ایرانی پولیس اہل کاروں نے بازپرس کی ہے، جبکہ تہران پولیس کے سربراہ بریگیڈیئر جنرل حسین رحیمی نے کہا ہے کہ شاید ان پر مجرمانہ مقدمات بھی قائم کیے جائیں گے۔

شاپنگ سینٹروں میں موجود بعض خریداروں نے فنکاروں کو پہچان لیا، لیکن اکثریت ان سے خوف زدہ ہوکر بھاگی اور اس سے شدید بھگدڑ مچ گئی۔