گلوکارہ ثمینہ سندھو کو کیوں قتل کیا گیا

حیدرآباد : گلوکارہ ثمینہ سندھو کو کیوں قتل کیا گیا ؟ گرفتار ملزم نے اصل بات بتا دی

لاڑکانہ(ویب ڈیسک) سندھ کے شہر لاڑکانہ میں شادی کی تقریب میں فائرنگ سے قتل ہونے والی مقامی گلوگارہ ثمینہ سندھو کو ایک بااثر شخص نے اپنی فرمائش پر رقص نہ کرنے پر گولیاں ماریں، گلوکارہ ثمینہ سندھو ایک سندھی گیت گا رہی تھی۔تقریب میں موجود ایک شخص نے گن پوائنٹ پر گلوکارہ سے

کہا کہ وہ کھڑی ہو کر ڈانس کرے، اس شخص کے ہاتھ میں پستول دیکھ کر گلوکارہ کھڑی ہوئی مگر ڈانس کا حکم نہ مان سکی، اس شخص نے گلوکارہ پر3 گولیاں برسا دیں، جس سے وہ موقع پر ہی جاں بحق ہوگئی۔ڈی آئی جی لاڑکانہ عبداللہ شیخ کے مطابق ثمینہ سندھو کے قتل میں ملوث شخص کو گرفتار کرلیا گیا ہے، جس کی شناخت طارق جتوئی کے نام سے ہوئی ہے۔تاہم اطلاعات ہیں کہ پولیس نے ابتدائی طور پر قتل کے واقعے کو چھپانے کی کوشش کی اور کہا کہ یہ واقعہ ہوائی فائرنگ سے پیش آیا۔ وہاں پر بنی ویڈیو میں صاف دیکھا اور سنا جا سکتا ہے کہ 3 گولیاں چلائی گئیں جن کا نشانہ صرف گلوکارہ ثمینہ سندھو بنی۔ڈی آئی جی لاڑکانہ کے مطابق تقریب کے دوران بنائی گئی ویڈیوز کو بھی تفتیش کا حصہ بنایا جائے گا۔دوسری جانب مقتولہ کے شوہر کا کہنا ہے کہ ثمینہ سندھو حاملہ تھیں اور یہ دوہرا قتل ہے۔دوسری جانب سابق صدر اور پاکستان پیپلز پارٹی کے شریک چیئرمین آصف علی زرداری نے واقعے کا نوٹس لے لیا اور ملزمان کو انصاف کے کٹہرے میں لانے کی ہدایت کردی۔نوائے وقت رپورٹ کے مطابق گلوکارہ ثمینہ سندھو کے قتل میں ملوث ملزم طارق جتوئی کو ریمانڈ پر پولیس کے حوالے کر دیا گیا۔ گلوکارہ کے قتل پر مقامی فنکاروں نے احتجاج کیا اور ملزمان کو کڑی سزا دینے کا مطالبہ کیا ہے۔